STORMANNSGALSKAP

Frå Trump, via Putin og Netanyahu, til dreiinga mot meir høgreorienterte og autoritære parti og politikarar i Europa: Det skjer så mykje galskap verda over akkurat no at ein lett kan miste perspektivet på kva som er normalt og kva som er ekstremt. I Argentina sit det i dag ein president som av mange blir karakterisert som stormannsgal. 

Kva er eigentleg stormannsgalskap? Kva er det som gjer at eit menneske kan bli stormannsgal? Kva slags menneskelege mekanismar er det som er i spel, og kvifor går nokre lenger enn andre for å få makt?

Kan ein argentinsk klassikar lære oss noko om det som skjer i verda i dag? I klassikarserien til Skald er det nyleg gitt ut ein argentinsk klassikar: I Sju galningar (1929) skildrar Roberto Arlt eit Buenos Aires der dei som kjenner seg utstøytte og minst privilegerte slår seg saman for å skape eit nytt verdsherredømme. Ein assortert og eigentleg heilt uforeienleg gjeng av små og store kjeltringar, horer og hallikar, skrønande gullgravarar, revolusjonære militære og mystiske drøymarar samlar seg rundt ein mystisk figur som kallar seg Astrologen. Det einaste dei har til felles er ei bitter kjensle av at verda har svikta dei, og no ser dei ein sjanse til å ta kontroll over sin eigen lagnad. Romanen er driven av ein rasande desperasjon, eit agg mot samfunnet og ein hemningslaus fantasi som gjer teksten til ein nærast profetisk parabel over det som skjer fleire stader i verda i dag. Det kanskje mest opprivande med boka er stormannsgalskapen som ligg som ein raud tråd gjennom heile den ville historia.

Omsetjar av Sju galningar, Øystein Vidnes, og forfattar og debattant Jette F. Christensen, møter Elise Winterthun til samtale om litterære og realpolitiske blikk på stormannsgalskap.

Arrangementet er ein del av Litteratursymposiet i Odda 2025, med tema EKSPLOSJON.
Heile programmet finn du på littsymp.no.

Det er mykje kjekt som skjer, hugs at du òg kan kjøpa FESTIVALPASS  eller DAGSPASS.